Furðusögur: Fantasíur og furðulönd
Endurmenntun HÍ, Dunhagi 7, 107 Reykjavík Directions
Thu Feb 25 2027 19:00
Hvernig skrifar maður heilan heim? Hvernig vekur maður óhug hjá lesendum? Hvað telst vera vísindaskáldskapur í heimi þar sem tækninni fleygir ógnarhratt fram?
Á þessu námskeiði könnum við helstu einkenni furðusagna ásamt því að æfa okkur í þróun og ritun innan ólíkra greina, svo sem fantasíu, vísindaskáldskapar og hryllings. Skoðað verður hvernig þessar greinar birtast í bókmenntum og öðrum listgreinum og hvað einkennir þær. Við köfum ofan í einkenni greinanna, prófum okkur áfram við heimsmótun (e. world building) og vinnum með leiðir til að skapa furðusagnahugtök og þróa þau áfram í frásögn.
Námskeiðið hentar áhugafólki um furðubókmenntir sem hefur einhverja reynslu af skrifum, en vill dýpka þekkingu sína og færni. Þátttakendur mega gjarnan koma með verk eða hugmynd í vinnslu og nýta námskeiðið til að þróa hana áfram, en það er ekki nauðsynlegt.
Skrifað verður í tímum, svo þátttakendur þurfa að hafa með sér annað hvort fartölvu eða stílabók. Notkun stórra mállíkana og annarra gervigreindarverkfæra við ritun og hugmyndavinnu er ekki heimil á námskeiðinu, enda byggist námið á eigin sköpun, tilraunum og vinnu þátttakenda.
Efni og ávinningur
Á námskeiðinu er fjallað um:
- Einkenni furðusagna í bókmenntum og öðrum listgreinum.
- Mótun og þróun söguheima í fantasíum og vísindaskáldskap.
- Hvernig ótti, óhugnaður og drungi eru byggð upp í hryllingi.
Ávinningur þinn:
- Þú eykur skilning þinn á helstu einkennum furðusagna.
- Þú færð þjálfun í að ræða og greina verk innan mismunandi greina furðusagna.
- Þú færð þjálfun í því að skrifa um ímyndaða heima.
- Þú færð verkfæri sem nýtast við að þróa og stækka hugmyndir og hugtök.